Nous vagn grond plascheir tgi Vous faschez ena viseta alla website digl cumegn da Salouf ed Az faschagn en cordial bavegna an nom da tot las autoritads communalas.

An chella maniera lessan nous metter a disposiziun ena plattafurma d’infurmaziuns davart igl cumegn da Salouf alla populaziun indigena ed a noss giasts da vacanzas. La nossa pagina na duess dantant betg angal funcziunar scu pagina d’infurmaziuns, mabagn er Az dar la pussebladad d’ans far a saveir igls Voss giaveischs e las Vossas ideias scu er la Vossa critica.
 

Salouf ò ples fatschas – chella digl li da recreaziun da staschung ota – chella d’ena vischnanca purila da gronda tradiziun cun ena preziousa substanza architectonica istorica da staschung morta– chella d’en li da pelegrinadi ancunaschaint gliunsch anturn e naturalmaintg chella d’ena vischnanca da pastgeders e catscheders. Occurenzas multifaras da cultura e furmaziun, scu er occurenzas dad uniuns, organisaziuns da giuventetna e sport, da chors, d’orchesters, digl cumegn-baselgia ed anc bler oter procuran per en veiv travagl variia an vischnanca.

La bela nateira intacta porscha en ambiaint ideal per sa revigneir, trotgs e sendas per spassager e viandar, veias per eir cun velo ed eir a tgavagl, loipas, pistas da skis, pendicularas fitg modernas ed igl lai Barnagn per eir a far bogn – tot chegl cattez an Surses.

Nous speragn tgi nossas curtas infurmaziuns davart la vischnanca, las autoritads, las instituziuns ed uniuns Az faciliteschan igl access ad organisaziuns e persungas e tgi Vous possas uscheia Az santeir da tgesa cò tar nous!

Gian Sonder
mastral